ՄԱԶԾ-ի «Կայուն համայնքներ» ծրագրի շրջանակում իրականացվող «Honey-Money» նախաձեռնության արդյունքում Արարատի մարզի շահառուները ստացել են մեղվաբուծության համար նախատեսված փեթակներ և անհրաժեշտ պարագաներ։
Արարատի մարզում ծրագրի աջակցությունից օգտվել է 62 շահառու, որոնց տրամադրվել է ընդհանուր 155 մեղվափեթակ և 62 գործիքների հավաքածու, որոնք ներառում են՝ փուքս, դանակ, քերիչ, մեղվաբուծական ձեռնոց և գլխարկով բաճկոն, իսկ 16 շահառուի տրամադրվել է նաև էլեկտրական դանակ։
Մասնակիցների համար կազմակերպվել են եռօրյա ինտենսիվ դասընթացներ, որոնց ընթացքում նրանք ծանոթացել են ժամանակակից մեղվաբուծության հիմնական սկզբունքներին։ Դասընթացների ավարտին անցկացվել է գնահատում, որի արդյունքներով ընտրված մասնակիցներին տրամադրվել են մեղվափեթակներ և մասնագիտական գործիքների հավաքածուներ՝ իրենց տնտեսությունները հիմնելու կամ ընդլայնելու նպատակով։
Ծրագիրը նպատակ ունի աջակցել Լեռնային Ղարաբաղից փախստականներին, որոնք բնակություն են հաստատել Կոտայքի, Արարատի և Արմավիրի մարզերում։ Այն իրականացվել է Ֆրանսիայի կառավարության ֆինանսական աջակցությամբ՝ «Ապակենտրոնացված համագործակցության» շրջանակում։ Ընդհանուր առմամբ, նախաձեռնությանը մասնակցել է 194 մարդ, որոնցից 53-ը կանայք են։ Ծրագիրը նպաստում է շահառուների եկամուտների ստեղծմանը և կայուն կենսամիջոցների ձևավորմանը։
