ՄԱԶԾ «Կայուն համայնքներ» ծրագրի թիմը Մասիսի համայնքապետարանում հանդիպել է Մասիս համայնքի բնակավայրերի վարչական ղեկավարների հետ և մանրամասն ներկայացրրել «Բերքառատ հող» նախաձեռնության շրջանակում իրականացվող դասընթացները։
Հանդիպման ընթացքում Մասիս համայնքի ղեկավար Նորայր Հակոբյանը ողջունեց ՄԱԶԾ-ի և Մասիսի համայնքապետարանի սերտ համագործակցությունը՝ կարևորելով հերթական ծրագրի իրականացումը և համայնքի բնակիչներին նոր հնարավորությունների ընձեռումը։
«Բերքառատ հող» նախաձեռնության շրջանակում Մասիս համայնքի բնակիչներին առաջարկվում է 5 մասնագիտական դասընթաց՝
- Հողի որակ և բույսերի արդյունավետ սնուցում,
- Վնասատուների և հիվանդությունների դեմ պայքար,
- Բարձրարժեք մշակաբույսերի արտադրություն,
- Լոլիկի, պղպեղի և այլ մորմազգիների մշակում,
- Վարունգի և դդմազգի մշակաբույսերի մշակում։
Դասընթացների ընթացքում մասնակիցները ձեռք կբերեն գործնական գիտելիքներ հողի և ոռոգման ջրի կառավարման, պարարտացման, ֆերտիգացիայի, խնայող ոռոգման, բույսերի պաշտպանության, ժամանակակից սորտերի և հիբրիդների ընտրության ու մշակության վերաբերյալ։ Բացի մասնագիտական գիտելիքներից, մասնակիցներին կտրամադրվի նաև աջակցություն՝ հողի անալիզի ֆինանսավորում, կպչուն թակարդներ, կենսապատրաստուկներ, բարձրարժեք մշակաբույսերի, լոլիկի, պղպեղի և վարունգի հիբրիդային սերմերի փաթեթներ։
Յուրաքանչյուր անձ կարող է մասնակցել իր նախընտրած թվով դասընթացներին՝ նախապես գրանցվելով SCA.am կայքում։
Ծրագիրն իրականացվում է ՄԱԶԾ-ի կողմից՝ Ճապոնիայի կառավարության ֆինանսական աջակցությամբ՝ «Խթանելով Լեռնային Ղարաբաղից տեղահանված անձանց և հյուրընկալող համայնքների համար դիմակայուն գյուղատնտեսության զարգացումը» ծրագրի շրջանակում։
