ՄԱԶԾ «Կայուն համայնքներ» ծրագրի շրջանակում իրականացվող «Honey-Money» նախաձեռնության արդյունքում Արմավիրի մարզի շահառուները ստացել են մեղվաբուծության համար նախատեսված փեթակներ և անհրաժեշտ պարագաներ։
Մասնակիցների համար կազմակերպվել էին եռօրյա ինտենսիվ դասընթացներ, որոնց ընթացքում նրանք ծանոթացել են ժամանակակից մեղվաբուծության հիմնական սկզբունքներին։ Դասընթացների ավարտին անցկացվել է գնահատում, որի արդյունքներով ընտրված մասնակիցներին տրամադրվել են մեղվափեթակներ և մասնագիտական գործիքների հավաքածուներ՝ իրենց տնտեսությունները հիմնելու կամ ընդլայնելու նպատակով։
Արմավիրի մարզում ծրագրի աջակցությունից օգտվել է 49 շահառու, որոնց տրամադրվել է ընդհանուր 120 մեղվափեթակ և 49 գործիքների հավաքածու, որոնք ներառում են՝ փուքս, դանակ, քերիչ, մեղվաբուծական ձեռնոց և գլխարկով բաճկոն, իսկ 18 շահառուի տրամադրվել է նաև էլեկտրական դանակ։
Ծրագիրը նպատակ ունի աջակցել Լեռնային Ղարաբաղից փախստականներին, որոնք բնակություն են հաստատել Կոտայքի, Արարատի և Արմավիրի մարզերում։ Այն իրականացվել է Ֆրանսիայի կառավարության ֆինանսական աջակցությամբ՝ «Ապակենտրոնացված համագործակցության» շրջանակում։ Ընդհանուր առմամբ, ծրագրին մասնակցել է ընդհանուր 194 մարդ, որոնցից 53-ը՝ կանայք։
