ՄԱԶԾ «Կայուն համայնքներ» ծրագիրը Սյունիքի մարզի Գորիս համայնքի Վերիշեն և Ակներ բնակավայրերում իրականացնում է նոր «Նեքսուս Գորիս» նախաձեռնությունը՝ որպես նոր մոդելի պիլոտային ծրագիր։ Այս մոդելը միավորում է գյուղական և քաղաքային համայնքների ռեսուրսներն ու հնարավորությունները՝ նպաստելով համագործակցությանը և տնտեսական զարգացման նոր հնարավորությունների ստեղծմանը։ «Նեքսուս» մոդելի պիլոտային փուլի համար ընտրվել է ՄԱԶԾ «Կայուն համայնքներ» ծրագրի «Ջերմատուն» նախաձեռնությունը, որն աջակցում է մոտիվացված շահառուներին՝ հիմնելու սեփական ջերմատնային բիզնես։
Գորիսում անցկացված «Ջերմատնային պայմաններում բույսերի մշակում» երկօրյա վերապատրաստմանը մասնակցելու համար դիմում-հայտ էր ներկայացրել 27 մարդ՝ 8-ը Ակներից և 19-ը Վերիշենից։
Դասընթացի մասնակիցները ծանոթացել են ջերմատան տեսակներին և կառուցվածքին, օդափոխության, ոռոգման, ստվերապատման, ջեռուցման համակարգերի նրբություններին, մշակաբույսերի աճի, մշակման ու սեզոնային պլանավորմանը։ Դասընթացի ընթացքում ներկայացվել են նաև վնասատուների ու հիվանդությունների դեմ պայքարի միջոցները, հողի բերրիության բարձրացման եղանակները և բերքահավաքից հետո անհրաժեշտ գործողությունները
ՄԱԶԾ փորձագետները այցելել են 20 մասնակցի հողամասեր՝ գնահատելու հողի վիճակը, շահառուների պատրաստակամությունն ու ներդրում կատարելու հնարավորությունը։ Առաջիկայում բոլոր մասնակիցները կհրավիրվեն բիզնես վերապատրաստման դասընթացի։ Շահառուների վերջնական ընտրությունը կկատարվի բոլոր դասընթացների և վերապատրաստումների արդյունքների, ինչպես նաև գնահատող հանձնաժողովի գնահատականների հիման վրա։ Ընտրված շահառուներին կտրամադրվեն 150 ք․մ․ մակերեսով թունելային ջերմատներ՝ սեփական ջերմոցային տնտեսությունը սկսելու համար։
