Արենի համայնքում բացվեց ևս երկու «Քաղցր Տուն», որոնք զբաղվում են չրերի, քաղցրավենիքի և պահածոների արտադրությամբ: Վայոց ձորի մարզի Արենի համայնքում բացման պաշտոնական արարողությանը ներկա էին ՄԱԶԾ սոցիալ-տնտեսական զարգացման ծրագրերի ղեկավար Աննա Գյուրջյանը, ՌԴ դեսպանատան առաջին քարտուղար Եկատերինա Իվանովան, «Կայուն համայնքներ» ծրագրի ղեկավար Արման Վալեսյանը, Վայոց ձորի մարզպետի տեղակալ Արսեն Խաչատրյանը, Արենի համայնքի ղեկավար Հուսիկ Սահակյանը և այլ պաշտոնյա հյուրեր։
«Քաղցր Տուն» ծրագրի շահառուներ Նարինե Կյուրեղյանին և Սոնիկ Հայրապետյանին տրամադրվել են գյուղատնտեսական մթերքների վերամշակման սարքավորումներ և արտադրության կազմակերպման համար անհրաժեշտ չժանգոտող պողպատից արտադրական գույք՝ այդ թվում չրի չորացման ցանցեր, էլեկտրական չորանոց, կաթսա, ավտոկլավ։ Իրականացվել են նաև վերապատրաստման դասընթացներ և խորհրդատվություն։ Նարինեն և Սոնիկը մասնակցել են «Չիր-Չիր» ծրագրին, որի շրջանակում ստացել են մասնագիտականն գիտելիքներ չրագործության վերաբերյալ։ Նոր սարքավորումների շնորհիվ և՛ Նարինեն, և՛ Սոնիկը կարողացել են ավելացնել արտադրական ծավալները, ստեղծել չրերի հիմքով նոր քաղցրավենիքներ։
Բացման արարողությունից հետո հյուրերը շրջեցին 2 արտադրամասերում, ծանոթացան արտադրական գործընթացներին, զրուցեցին շահառուների հետ և համտեսեցին շահառուների արտադրամասերում պատրաստված քաղցրավենիքը։
ՄԱԶԾ «Կայուն համայնքներ» ծրագրի «Քաղցր Տուն» նախաձեռնությունը մեկնարկել է 2022 թվականին՝ նպատակ ունենալով աջակցել գյուղական համայնքներում գործող փոքր բիզնեսներին՝ մասնավորապես մեղրի, մրգերի և բանջարեղենի հիմքով քաղցրավենիքի արտադրության ոլորտում։
