ՄԱԶԾ «Կայուն համայնքներ» ծրագրի «Քաղցր տուն» ծրագրի շահառուները համագործակցության նոր ուղիներ են ստեղծում։ «Գաստրո բակ» նախագծի շահառու դարձած «Ստեփանյանների Գաստրո Բակում» «Քաղցր տուն» ծրագրի տարբեր տարիների շահառուները հանդիպել են մեկ հարկի տակ, ծանոթացել, քննարկել համագործակցության հնարավորությունները։ «Քաղցր տուն» ծրագիրն ունի 3 ուղղություն՝ մեղրի, չրերի և մուրաբաների արտադրություն։
«Սա կարևոր հանդիպում էր, որովհետև կարողացանք ծրագրի բոլոր շահառուներին հավաքել մեկ տեղում ու ամենակարևորը՝ ծանոթացնել միմյանց հետ։ Ծրագիրն ունի 3 ուղղություն ու շահառուները կարող են մեկը մյուսից մթերում կատարել։ Օրինակ՝ չրագործությամբ զբաղվող շահառուները կարող են մեղր գնել մեղվապահությամբ զբաղվող շահառուից։ Այս շղթան մեզ հնարավորություն է տալիս վստահ լինել ապրանքի որակի վրա, քանի որ ծրագրի շահառու բոլոր արտադրամասերում իրականացվում է որակի խիստ վերահսկողություն»,-նշեց ՄԱԶԾ փորձագետ Լուսինե Բալայանը։
«Քաղցր տուն» ծրագրի շահառուները նոր պրոդուկտներ ստեղծելու փորձեր են կատարում։ Օրինակ մեղվապահությամբ զբաղվող շահառուները ՄԱԶԾ-ի կողմից տրամադրված սարքերով փորձարկում են կրեմ-մեղրի արտադրությունը, չրագործները տարբեր փորձեր են անում չրի և շոկոլադի համադրությամբ։ ՄԱԶԾ «Կայուն համայնքներ» ծրագրի «Քաղցր տուն» ծրագիրը նպատակ ունի դառնալ զբոսաշրջային նոր ուղղություն, ինչպես «Գաստրո բակը»։ Այդ նպատակով շահառուներին ներկայացվել է «Ստեփանյանների Գաստրո Բակը», տեղում հիմնադիր Հայկ Ստեփանյանը և ՄԱԶԾ փորձագետ Լուսինե Բալայանը պատմել են «Գաստրո բակի» մտահղացման, հիմնադրման և անցած ուղղու մասին։
