Ինչպե՞ս պատահականությունը առիթ դարձավ զբաղվելու գինեգործությամբ. առաջին հայացքից ոչ այնքան պարզ թվացող այս նախաբանը ամենևին կատակ չէ, այլ ապացույց, որ ոչինչ պատահական չի լինում։
Հասմիկ Մովսիսյանը մի օր, հերթական անգամ, նռան հյութ պատրաստելիս մոռացավ շիշը փակել, դնել սառնարան, և հենց այդտեղից ամեն ինչ սկսվեց.
«Նռան գինին առաջին անգամ շատ պատահական եմ պատրաստել։ Մի անգամ տանը հյուրեր ունեի ու նրանց հյուրասիրեցի իմ պատրաստած նռան հյութից։ Հյուրերին ճանապարհելուց հետո ընկղմվեցի տան գործերի մեջ ու մոռացա փակել հյութի շիշը։ Երբ հիշեցի, գնացի տեսա, որ այն արդեն մաճառ է դարձել։ Խմեցի ու շատ հավանեցի։ Այդպես էլ որոշեցինք նռան գինի պատրաստել»,- պատմում է Հասմիկը։
Նռան արտադրամաս գնալիս տիկին Հասմիկը միշտ ժպիտով է ներս մտնում, հետո պարտադիր ձեռքով հպվում է նռան գինու պահոց-տարաներին ու նոր անցնում գործի։ Երբ հարցնում ես՝ ինչպես որոշեցիք այս բիզնեսով զբաղվել, առաջին պատասխանը հպարտ ժպիտն է, իսկ հետո՝
«Մենք գնացինք մեր երազանքի հետևից ու հասանք մեր նպատակին։ Պետք է անկեղծ լինեմ. այս ամենի մասին մենք միայն երազում էինք։ Մեկ տարի առաջ, եթե գայիք այստեղ ու տեսնեիք, թե ինչ պայմաններ էին, պարզապես չէիք հավատա։ Իսկ հիմա հին տարածքից ոչինչ չի մնացել, ամեն ինչ փոխվել է, կատարելագործվել»։
ՄԱԶԾ «Կայուն համայնքներ» ծրագրի «Նուռ» նախագծի շրջանակում Սյունիքի մարզի Մեղրի համայնքի Ալվանք գյուղում հիմնադրվել է նախագծի առաջին նռան հյութի արտադրամասը։ Շահառուին տրամադրվել են գինու պահամաններ, հյութը քամող չանչազատիչ սարք, հիդրավլիկ մամլիչ, ինքնահոս պոմպ, շերտավոր ֆիլտր, խցանող սարք, չափիչ սափոր և այլ սարքավորումներ։ Իրականացվել են արտադրական տարածքի շինարարական աշխատանքներ, ինչպես նաև հյութի և գինու որակի վերահսկում, տրամադրվել է մասնագիտական խորհրդատվություն։
«Մինչև ծրագրի շահառու դառնալը կարծես չէի հավատում, որ մեր երազանքը իրականություն կդառնա։ Մինչև վերջին պահը ամեն ինչ անհավատալի էր թվում։ Իսկ հիմա, երբ նայում եմ շուրջս, հասկանում եմ, որ մեր երկար տարիների անդադար աշխատանքը գնահատվեց, և մենք դարձանք ծրագրի շահառու ու հիմնեցինք մեր նռան արտադրամասը»,- նշում է Հասմիկը։
Նռան արտադրամասում արտադրվում են նռան հյութ և գինի։ Անգամ նռան հատիկների կորիզները մեծ պահանջարկ ունեն. դրանցով հնարավոր է պատրաստել մաշկի խնամքի սկրաբ։
«Մեր ընտանիքն արդեն 20 տարի զբաղվում է գինեգործությամբ և հյութի արտադրությամբ։ Նախկինում ամեն ինչ ձեռքով էինք անում և ինքնաշեն սարքերով։ Գինին ստիպված պահում էինք ապակյա տարաների մեջ, ինչը բարդացնում էր մեր աշխատանքը, քանի որ մեծ ծավալների դեպքում տարաները պարզապես չէին հերիքում, և ստիպված էինք նորերը գնել»,- պատմում է Հասմիկը։
ՄԱԶԾ-ի տրամադրած նոր սարքավորումների շնորհիվ արտադրական ծավալները կրկնապատկվել են։ Մեծացել են նաև նռան մթերման ծավալները։ Հասմիկ Մովսիսյանը նշում է, որ գյուղի բնակիչները շատ ոգևորված են իր արտադրամասով, որովհետև գիտեն, որ իրենց բերքը կմթերեն, և իրենց ապրանքը չի փչանա։ Այժմ նուռ են մթերում ավելի քան 50 տնտեսություններից։
