Հայաստանում առաջին «Քաղցր տունը» Արարատի մարզի Նոր Կյանք բնակավայրում է։ Փողոցի ցուցանակները հուշում են՝ ինչպես մոտենալ։ Հիմնադիր Մելինե Խնձրցյանն իր տան խորդանոցը վերածեց ժամանակակից պայմաններով ու տեսքով արտադրամասի։ Հիմա անհնար է կռահել, որ այստեղ նախկինում խորդանոց է եղել․ դրա միակ վկայությունը մուտքի դիմաց փակցված առաջ-և-հետո պաստառի նկարներն են։ «Մենք ծրագրի առաջնեկն ենք»,-հպարտությամբ նշում է Մելինեն․ «Արտադրամասի համար հարմար տարածքն ունեինք, սեփական մեծ այգին կար, մնում էր սկսել։ 2022-ին սկսեցինք ու արագ ավարտեցինք շինարարությունը․ տարեվերջին արդեն ամեն ինչ պատրաստ էր»։
ՄԱԶԾ «Քաղցր տուն» ծրագիրն իրականացվել է համաֆինանսավորման սկզբունքով։ Նպատակը գյուղական բնակավայրերում միրգ-բանջարեղենի վերամշակմամբ զբաղվող փոքր բիզնեսներին աջակցելն է, որոնք արտադրում են քաղցրավենիք, չրեր, մուրաբաներ, մեղրամթերք։ Նախագիծը չափանիշ է դարձրել «Գաստրո բակ» ծրագրի հայեցակարգը, որը հաջողությամբ իրականացվել է գյուղական տուրիզմի զարգացման համար։ «Քաղցր տուն» ծրագրի շրջանակում տրամադրվել է գյուղատնտեսական մթերքների վերամշակման սարքավորումներ և արտադրության կազմակերպման համար նախատեսված գույք։ Իրականացվել են նաև վերապատրաստման դասընթացներ և խորհրդատվություն։
«Հետաքրքիր համընկավ պահը․ երեխաներս արդեն մեծ էին ու կարող էի ինձ թույլ տալ վերադառնալ աշխատանքային ռիթմին։ Երբ սկսեցի մտածել աշխատելու մասին հայտնվեց «Քաղցր տունը» ու տնային տնտեսուհուց դարձա գործարար կին։ Չէի պատկերացնում որ կհաջողվի այսքանն իրականություն դարձնել, բայց դուք էլ եք տեսնում արդյունքը»,-նշում է Մելինե Խնձրցյանը։
«Քաղցր տանը» բացի չրից արտադրում են նաև դոշաբ, տնական կոմպոտներ, փակոցներ, մուրաբաներ ու ջեմեր։ Իսկ չրերի տեսականին տարեցտարի համալրում են․ «Ամեն անգամ նոր փորձարկումներ ենք անում ու փորձում ավելացնել տեսականին։ Այս տարի ավելացրել ենք լոլիկի, բալի ու թթի չրեր»,-պատմում է Մելինեն։
Մելինե Խնձրցյան, «Քաղցր տուն» ծրագիր
Արտադրամասում ընտանեկան բիզնեսի դերերի բաժանումը հստակ է ասում է Մելինեն․ «Հայրիկս զբաղվում է մթերմամբ, աշխատողների հետ շփումն ու ավանդական բաղադրատոմսերի պահպանումը մայրիկիս գծով է, ամուսինս փաստաթղթաշրջանառության պատասխանատուն է իսկ ես՝ որտեղ, երբ պատահի․ ես ամեն ինչի պատասխանատուն եմ»։
Բերքի մեծ մասը գնում են համագյուղացիներից, քանի որ սեփական այգու բերքն այլևս չի բավականացնում։ Մթերում են նաև այլ մարզերից․ «Գնում ենք գյուղերով, ընտրում լավագույն մրգերն ու գնում, այդպես նաև օգնում ենք մեր համագյուղացիներին ու մենք էլ գոհ ենք մնում որակից»,-ասում է Մելինե Խնձրցյանը։ Արարատի մարզի Նոր կյանք բնակավայրում Մելինեի «Քաղցր տունը» նաև նոր աշխատատեղեր է ստեղծում․ «Երբ «Քաղցր տունը» նոր էինք գործարկել ամբողջ ընտանիքով էինք աշխատում, սակայն եկավ մի պահ, որ հասկացանք առանց աշխատակիցների անհնար է։ Այս պահին 3 աշխատող ունենք, որոնք Լեռնային Ղարաբաղից են։ Բոլոր աշխատակիցները կանայք են։ Աշխատանքն էլ շատ հեշտ է ու հաճելի, ոչ մի ֆիզիկական ծանր աշխատանք չի պահանջում։ Բոլորը մեծ սիրով են աշխատում»։
Մելինեն մտադիր է առաջիկայում ավելացնել արտադրանքի ծավալներն ու աշխատատեղերի քանակը․ «Մեր գյուղից շատ են գալիս հարցնում ինչպե՞ս գանք ձեզ մոտ աշխատենք։ Հուսանք աստիճանաբար կկարողանանք ընդլայնվել»։ Մելինեն պատմում է, որ գյուղում իր արտադրամասը շատերին է ոգևորել սեփական բիզնես սկսել․ «Մի համագյուղացի ունենք, որը եկավ տեսավ մեր արտադրամասը ոգեշնչվեց ու հիմա մեծ տարածք է գնել ու մտադիր է չրի արտադրամաս հիմնել։ Նաև շատ են հարցնում թե ինչպես է պետք նման բիզնես հիմնել, ես միշտ խորհուրդներով կիսվում եմ ու փորձում ոգեշնչել»,-ասում է Մելինեն։ Այս տարվա ամենակարևոր անելիքը բրենդի ստեղծումն է։ Երբ բրենդը պատրաստ լինի արդեն ավելի մասշտաբային կներկայացնեն սեփական արտադրանքը հայաստանյան շուկայում։
